ملف كامل عن الطرح

إيه هى أحدث خامات الطرح ؟

كل فصل من فصول السنة له خامة، يعنى فى فصل الصيف ممكن نلبس الطرح الأقطان الخفيفة والشيفون.. وفى فصل الشتاء نلبس الطرح القطن الثقيلة شوية ، أما الأورجانزا والتول والشيفون فممكن نلبسهم في أي وقت وبيناسبوا أكثر السهرات والسواريه.

وإيه هى أحدث أشكال وأنواع البندانة؟

أولا أنا عايزة أنصح كل البنات بإنهم يلبسوا (البندانة القطن) فى الأساس على شعرهم مباشرة لأنها مفيدة وصحية جدا وتمنع تساقط الشعر وتحافظ عليه وكمان بتساعد على وضع الدبابيس كويس ولا تساعد على تزحلق الطرحة...


وعلى فكرة البندانة دلوقتى بقت بديل عن الطرحة، يعنى تقدر البنت تضع أكثر من لون للبندانة على إنهم طرح ملونة وتضع فى النهاية طرحة واحدة فى الواجهة، وفيه أنواع كثيرة من البندانة زى البندانة "الليكرا "- "شيفون"- "التول". وعرضها 10سم وطولها 30 سم وكمان البندانة المستطيلة والبندانة الكاملة على الرأس وممكن البنت تلبسها بطريقة مائلة والعكس


هل ممكن البنت تستخدم الطرحة لإخفاء عيوب الوجه والمناطق الضخمة في وجها؟
آه طبعا.. أكيد..


طيب ازاى ؟
شوفى لو مثلا البنت وجهها طويل يبقى تحاول تعمل الطرحة لتحت فى اتجاه الخلف أو على جنب، وبعدين تقصر الجبهة وتضيف أى حاجة على الجانب علشان الوجه يبان إنه عريض.
وخلّى بالك إن الوجه الطويل لا يتناسب معاه الربطة العالية لأنها هتطوّل الوجه أكثر.


طيب لو بنت وجهها مدوّر؟
يبقى بلاش تلف الطرح على جنب إطلاقا لأنها تزيد من مساحة (الخدود) وتعمل الطرحة للخلف، لتحت أو لفوق، وممكن تعمل الطرحة شينوه لفوق، وممكن تعمل الربطة ديل حصان لفوق عشان الوش يكون رفيع.


والوجه المربع أو المستطيل؟
الوجه المربع والمستطيل بيكون عنده أربع بذور، اثنتين فى الجبهة واثنتين فى الفكين وعلشان كده لازم تنزل بالطرحة لتحت شوية ونعمل (كروس) طرحة عكس الثانية والطرحة بتساعد إن الوش يكون رفيع وتحاول تداري الجبهة وتحاول تنزل بالطرحة على الجبهة وتقفل الجبهة.


والوجه البيضاوى ؟
معظم الربطات تمشى معاه وممكن تعمل ربطة على جنب أو تقفل من قدام أو تعمل كروس.


طيب صاحبة الأنف الكبير تعمل إيه؟؟
صاحبة الأنف الكبير بيكون عندها مشكلة فى الحجاب لأن أنفها ظاهر وواضح فى الوجه وفى هذه الحالة ماينفعش معاها إننا نعمل إسبانش للخلف أو طرحة هابطة وماسكة على وجهها فتحاول إنها تلبس طرحة منفوشة شوية أو تضع إكسسوار أو تعمل أكتر من طبقة أو تدخل أكثر من بندانة عشان تخطف العين ولا تجعل التركيز على أنفها.


لو الشفايف كبيرة نعمل إيه؟
نفس الحكاية تحاول تلفت النظر بأى شئ يبعد التركيز عن وجهها وتعمل ماكياج كثير على عينها والطرحة تكون منفوشة وتغير فى الربطات والألوان.

نتكلم بالتفصيل شوية عن شكل الربطة المناسبة للبنت فى الجامعة؟
ربطة الطرحة لازم تكون بسيطة وخفيفة فممكن تستخدم طرحة أو طرحتين على الأكثر.. يا ريت تحاول تبعد عن الألوان الكثيرة وتكون رقيقة على قد ما تقدر وتبعد تماما عن التول والأورجانزا. وتاخد بالها كويس جدا من لبسها فلو مثلا لابسة حاجة سادة يبقى ممكن الطرحة يكون فيها ألوان، لكن لو لابسة حاجة ملونة أو فيها نقوش يبقى لازم الطرحة تبقى سادة.
وممكن البنت تنوع فى شكل ربطة الطرحة بتاعتها وهى رايحة الجامعة فممكن إنها تعمل ربطة إسبانش، بس تاخد بالها إنها تلفها زى الكحكة وتجيبها على قدام، ولو مش عايزة إسبانش يبقى تربطها عادي بطرحة أو طرحتين أو طرحة وبندانة.

عايزين طريقة لفة طرحة تكون روشة ؟

1- نجيب إيشارب واحد نربطه من الخلف طرف طويل وطرف قصير.
2- الإيشارب الثانى نمسكه بطريقة مائلة ونربطه من الخلف.
3-كده أصبح عندى أربعة أطراف فى الخلف، 2 قصيرين و2 طوال.
4-بعد كده أجيب واحد من الطرفين الطوال وأطلع بيه عدل وأربطه تانى للخلف.
5-كده المنظر أو الشكل عدل بميل واللى بعده عدل.
6-هيكون باقى عندى طرف طويل وطرفين قصيرين.. في هذه الحالة ممكن أجيب الطرف الطويل ألفه على الكحكة وأجيب الثلاثة أطراف على قدام.
7-لو الأطراف طويلة أعملهم ضفيرة لقدام أو على الخلف.
8-وممكن فكرة ثانية أجيب الطرف الطويل ألفه على الطرفين القصيرين وأمسكهم في النصف بإكسسوار على كحكة من وراء.
9-إذن المنظر فى النهاية هيكون من قدام عدل ومائل ومن الظهر الأطراف عاملة زى (ذيل الحصان) ومربوطة بإكسسوار.



ربطة الطرحة السواريه تكون عاملة ازاى ؟

الأفضل تكون أكثر من طرحة وفى البداية:

1-أبدأ الأساس بالطرحة الشيفون.
2-بعدين أضع الطرحة التول عشان بيعطى للبنت شكل فخامة.
3-وبعدها أضع إكسسوار زى (شريط ستان – سلاسل خرج النجف) أو قطعة من الفستان.
4-وبعدها أقفل الطرحتين بأكثر من طريقة ممكن الشيفون والتول مع بعض لقدام أو المهم مع بعض كلهم شنيوه عالي لفوق.
عايزين نعرف طريقة ستايل لربطة التول والشيفون ؟
1- أجيب الطرحة الشيفون أربطها على شكل كحكة.
2-أجيب الطرحة التول وألبسها من الخلف وأعملها كروس على قدام.
3- أنزل بيهم تانى للخلف وكده هيعطينى شكل البندانة.
4- بعد كده ألمهم كلهم مع بعض على تحت الشيفون مع التول