Admin Administrator
سجل بتاريخ : 14/12/2010 عدد المساهمات : 211
| موضوع: احمد الشبكى يكتب طلعت انا الازمة الأحد 01 أكتوبر 2017, 1:28 pm | |
| احمد الشبكى يكتب طلعت انا الازمة بقلم : احمد الشبكى | | لحظه من فضلك ، بتقول الطريق واقف ليه !!؟؟ لا استني كده لما نشوف مع بعض .، المطلوب انك توقف الزمن لحظات وننزل نشوف الشارع وساعتها هتعرف هو فى اي ايه بالظبط !!. طبعا لو عرفت تفتح باب عربيتك وتنزل فى وسط الزحمه والعربيات اللى جنبك ومشيت شويه لغايه ما توصل للسبب بتاع الزحمه وانت ماشي هتشوف ايه !!؟؟؟
هتلاقي الميكروباص اللى واقف فى نصف الشارع وبينزل او بيطلع ركاب ، اصل الزبون اللى نازل معهوش فكه وهو بيفكله وبيديله الباقي ، وفى نفس اللحظه الميكروباص التاني بيزنق عليه وعايز يسبقه عشان يلحق الزباين عشان تركب معاه ، ساعتها هتلاقيهم كمكروباصات واقفين عملين مثلثات فى وسط الشارع عشان يقفلوا على بعض .
بعدها بخطوات بسيطه هتلاقي البنوته الجميله اللى سايقه العربيه وماسكه الدريكسيون بايديها الاتنين كأنه هيهرب منها ، وطالعه بوشها لاقدام فى ازاز العربيه عشان تشوف الشارع وطبعا اللى زى البنوته الجميله دي بتبقي متعرفش حاجه عن المرايات اللى فى جانب العربيه او مرايه الصالون فتلاقيها ماشيه لوحدها كده وحتى مش سامعه اى نوع من انواع الكلاكسات اللى حواليها ، ورغم كل ده بتكون مقتنعه انها احسن سواقه فى الدنيا ، واوعى تفكر انك تشرح لها حاجه لانك ساعاتها هتشوف نظراتها ليك بتقول ( شكلك مش فاهم حاجه اصلا ) . طبعا زي البنوته الجميله دى بالظبط جانبها عربيه تانيه عم الحاج قاعد نفس القاعده ويأما متعلم السواقه على كبر ، يأما فاكر نفسه سايق ايام التلاتينات وماشي على سرعه عشرة او خمستاشر وفاكر نفسه بيجري .
استني يا عم لسه بقيت الزحمه مخلصتش ، تعالى خطوتين قدام كده وانت تشوف بقي العجب .
هتلاقي الشاب الوسيم اللى واقف بالعربيه عشان يعدى البنات الحلوين اللى واقفين على الرصيف وعايزين يعدوا الجنب التاني من الشارع ، بيبقي شكلهم مستعجل جدا ، بس للاسف اول ما شافوا الواد الامور الوسيم اللى سايق العربيه وهو بيشاور ليهم عشان يعدوا الشارع ، كل واحده فيهم تخيلت نفسها ملكه جمال الكون وتبدأ تمشي بطريقه " الكات ووك " وكأنها عارضه ازياء على المسرح . وهاتك يا ضحك وسخسخه وكأنهم بيتمشوا على الكورنيش مش بيعدوا الشارع ، طبعا الواد الوسيم يا بيندم انه وقف لهم او بيتحول لـ الرجل الاخضر لو مستعجل .
وكمان زي البنات الحلوين دول هتلاقي برضه الراجل الطيب الكبير اللى لما تيجي تعديه الشارع وتقف له يفتكر كل امراض القلب والكلى اللى عنده ويتحرك بالتصوير البطئ الممل اللى يخليك تحس ان فى حد داس على زرار الريموت بتاع التحرك ببطء . وهووووووب جاله تاكسي من وراه مش باصص قدامه اصلاً عشان عمال يدور على الزباين من الشباك اللى جنبه ويديهم كلاكسات وهو مشغل اغاني مهرجانات باعلى صوت وتسمع اكبر خضه فى حياتك لما يدخل في العربيه ويجيب وش الفانوس والكصدام الخلفي وينزل طبعا الشاب الوسيم يلعن اللحظه اللى فكر يعدى فيها الراجل الكبير ، وطبعا مش هيوصل لحاجه مع سواق التاكسي واحتمال يلبسه الغلط ويخليه يصلح له على حسابه .
باااااااس يا عم . ادينا وصلنا لاخر الزحمه ، وغالبا هتلاقيها عند ملف للدوران ، وهتلاقي اتنين واقفين فى وش بعض واحد جاي مخالف والتاني بيلف على الواسع وسايبين عربياتهم وبيتخانقوا فى الشارع وكل الناس واقفه اللى عمال يخلص الخناقه واللى بيهدى واللى بيشتغل رجل مرور ويوسع السكه ، لغايه ما تسلك شويه .
واخيرا اقدر اقولك كده اديك عرفت الزحمه والطريق واقف ليه ...... ايه صوت السرينه دى ..... اخيرا دى عربيه المرور وصلت .... نرجع بقي الحمد لله الطريق بقي سالك وماشي اهو ....
ايه ده.!!!!! ايه ده !!!!!! الونش جارر العربيه ليه !!؟؟؟؟ ايوه يا فندم ، حضرتك عليك غرامه تعطيل طريق ، حضرتك سايب العربيه فى نص الشارع
والزحمه دى بسبب حضرتك ، حضرتك تتفضل مشكور تستلم عربيتك من المرور بعد دفع الغرامات
نشكركم على حسن تعاونكم معنا .
|
|
| |
|