أسرة محمد على

حكمت أسرة محمد على باشا مصر حوالى 150 سنه، اتولى الحكم فيها منهم حداشر واحد بألقاب والى و خديوى و سلطان و ملك :

محمد على باشا : ( اتولد فى كافالا ، مقدونيا ، 1769 - اتوفى فى اسكندريه فى 2 اغسطس 1849 ) حكم مصر من 17 مايو 1805 ل 1 سبتمبر 1848. اتدفن بعد وفاته فى الجامع بتاعه فى قلعة القاهره. بناء على معاهدة يوليه 1840، محمد على بقى نايب للسلطان العثمانلى على مصر ، و ان مصر تكون بحدودها القديمه وراثيه فى اسرته للإبن و الحفيد الأكبر سناً بس على أساس ان مصر تكون جزء من الدوله العثمانليه و يدفع ضريبه سنويه للباب العالى مع تحديد عدد الجيش ب 18 الف و ما يبنيش سفن حربيه. لما عييى محمد على سنة 1848 صدر فرمان من الباب العالى فى الأستانه بتعيين ابنه ابراهيم باشا والى على مصر.

ابراهيم باشا : ( اتوفى فى نوفمبر 1848 ) حكم مصر سنة 1848 بعد ما اتعين والى على مصر عن طريق فرمان من الباب العالى فى الأستانه لما عييى أبوه محمد على باشا.ابراهيم باشا قاد الجيش المصرى فى قمع ثوار اليونان المتمردين على تركيا العثمانليه و غزا فلسطين و الشام و عدى جبال طوروس و وصل لغاية كوتاهيه (1832 - 1833 ) ،و انتصر فى المعركه الفاصله بين المصريين و الأتراك فى أتريب (1839)، لكن الدول الأوروبيه الزمته بالتراجع عن كل المناطق اللى استولى عليها.

عباس حلمى الأول : (اتولد فى جده سنة 1813 - اتوفى فى بنها سنة 1854 ) حفيد محمد على باشا ، نشأ فى مصر و حكمها بعد وفاة عمه إبراهيم باشا من 10 نوفمبر 1848 لوفاته. عاش حياه فيها بذخ و أهمل شئون الدوله.

محمد سعيد باشا : (اتوفى فى يناير 1864 ) ابن محمد على باشا ، حكم مصر لغاية وفاته.

اسماعيل باشا : ابن ابراهيم باشا و حفيد محمد على باشا ، حكم من 19 يناير 1863. اتلقب بلقب " خديوى " سنة 1867 ، و حصر وراثة العرش فى ولاده بس. فى عهده افتتحت قناة السويس للملاحه العالميه لكن ديونه و و سياسته الماليه الوحشه ادت لعزله فى يونيه 1879 ، و اتنصب مكانه ابنه محمد توفيق خديوى على مصر. اتوفى فى الأستانه و اندفن فى مصر.

الخديوى محمد توفيق : اتنصب خديوى على مصر فى 26 يوليه 1879 بعد عزل أبوه اسماعيل باشا. فى عهده اندلعت الثوره العرابيه بقيادة أحمد عرابى و حصلت حادثة قصر النيل و واقعة ميدان عابدين (سبتمبر 1881) و انتهت باحتلال الانجليز لمصر سنة 1882.

عباس حلمى التانى : ابن الخديوى محمد توفيق اتنصب خديوى فى 8 يناير 1892 و حكم مصر لغاية عزله فى 10 سبتمبر 1914.

السلطان حسين كامل : الابن التانى لإسماعيل باشا. حكم من 1914 لغاية وفاته فى اكتوبر 1917. فى عهده خرجت مصر من سلطان تركيا و دخلت تحت الحمايه الانجليزيه. اتنازل ابنه الأمير كمال الدين حسين عن حقوقه فى تولى السلطنه المصريه.

فؤاد الأول : ابن اسماعيل باشا. اتنصب على عرش مصر فى 9 اكتوبر 1917. و فى مارس 1922 اتلقب بملك مصر. حكم لغاية ما اتوفى فى 28 ابريل 1936. فى عهده قامت ثورة 1919 بزعامة سعد زغلول ، و اتعملت فى مصر أول وزاره شعبيه برياسة سعد زغلول.

فاروق الأول : اتولد فى 11 فبراير 1920 ، اتنصب ملك على مصر فى 28 ابريل 1936 بعد وفاة أبوه فؤاد الأول. اكمنه كان لسه قاصر حكم تحت وصاية مجلس بيضم الأمير محمد على باشا و عزيز عزت باشا و شريف صبرى باشا ، لغاية ما اتسلم سلطاته الدستوريه الكامله فى 29 يوليه 1937. حكم لغاية ما اطاح بيه الانقلاب المعروف بثورة 23 يوليه 1952، و اجبر على التنازل عن عرش مصر لابنه الطفل أحمد فؤاد التانى. راح على ايطاليا و اتوفى فيها فى 18 مارس 1965 ، و اتدفن فى مسجد الرفاعى فى القلعه فى القاهره.

أحمد فؤاد التانى : ابن فاروق الاول اللى اتعزل. قعد على عرش مصر فى 26 يوليه 1952 ، و اكمنه كان طفل صغير اتشكل مجلس وصايه عليه كان بيضم الامير محمد عبد المنعم و بهى الدين بركات باشا و القائم مقام رشاد مهنا ، لغاية اعلان الجمهوريه المصريه فى 18 يونيه 1953 ، و بيه انتهى حكم اسرة محمد على باشا.



[ندعوك للتسجيل في المنتدى أو التعريف بنفسك لمعاينة هذه الصورة]
[ندعوك للتسجيل في المنتدى أو التعريف بنفسك لمعاينة هذا الرابط]