طريقة سوقراط

موضوع: طريقة سوقراط الإثنين 28 مارس 2011, 12:43 pm

طريقة سوقراط

[ندعوك للتسجيل في المنتدى أو التعريف بنفسك لمعاينة هذه الصورة]

سوقراط (باليونانى :Σωκράτης ، سوكراتيس) ( حوالى 469 ق م – 399 ق م) كان من واحد من اهم الفلاسفة الكلاسيكيين فى اليونان القديمه و بيعتبروه ابو الفلسفه الغربيه.حياته و موته و شخصيته و تفكيره كلهم كان ليهم تاثير عميق جدا على الفلسفه القديمه و الحديثه.سوقراط عاش و مات من غير ما يكتب و لا كتاب و كل اللى وصل لنا و المعلومات المتوافره عنه جت عن طريق الحوارات والنصوص و الحكايات اللى دونها تلامذته وراه و هو بيتكلم معاهم.من ابرز التلامذه اللى عرفو العالم بيه زينوفون و افلاطون فى كتابه حوارات سوقراط.حياة سوقراط الطويله انتهت بشكل صدم تلامذته و محبينه.حاكموه بتمهة تبويظ شباب اثينا و تحريضهم على الالهه و حكمو عليه بالاعدام و هو راجل عجوز عمره فوق السبعين سنه.الراجل العجوز دافع عن نفسه دفاع قوى و عقلانى اتدون فى كتب دفاع سوقراط و فى الاخر شربوه السم و مات بعد ما رفض محاولة الهروب اللى دبرها له تلامذته. سوقراط كان ابن سوفرونيسكوس اللى كان بيشتغل نحات و فايناريتى اللى كانت بتشتغل دايه. مرات سوقراط كان اسمها زانتيبى و كان عنده تلات اولاد. سوقراط شبه طريقته فى التفلسف و كأنه زى امه اللى كانت بتشتغل دايه ، بتساعد الستات على الولاده و هو كمان كان بيساعد الناس التانيين انهم يولودو افكارهم الخاصه بيهم ، و اضاف بسخريته المعروفه ان الافكار دى فى الغالب بتتولد ميته. سوقراط اسس علم نقاش جديد اسمه طريقة سوقراط.

طريقة سوقراط هى نوع من انواع الجدل بين الناس عشان يطلعوا و يثبتوا ان كلام واحد منهم صح و التانى غلط. اللى اسس الطريقه دى هو الفيلسوف سوقراط وهو بيناقش الناس بتوع اتينا و الناس اللى كان مختلف معهم و اللى كانوا بيهجموه. الطريقة دى معتدا على تبادل الاسئله بين الطرفيين والاجابات بينهم عشان يزودوا التعليل العقلى و انارة و تطليع افكار جديده. و بتعتمد فى الغالب على تحويل الدفاع عن فكره معينه للهجوم على عكسها اللى بيؤمن بيه الطرف التانى. وكمان بمحاوله انك تجر باللى ادامك انه يقول كلام يناقض و عكس كلامه وهو بيدافع عن فكرته. اتكلم افلاطون على الطريقه فى كتابه "مجادلات سقراط" و كتب تانيه واللى صور فيه استاذه سوقراط وهو بيجادل وبيتناقش مع مواطنين اتينا والناس على الاخلاق . فى ناس بتقول ان مؤسس الطريقه دى هو الفيلسوف بروتاجوراس وان سوقراط طورها و جددها و زود فيها بس مش مؤسسها.

[ندعوك للتسجيل في المنتدى أو التعريف بنفسك لمعاينة هذا الرابط]
[ندعوك للتسجيل في المنتدى أو التعريف بنفسك لمعاينة هذه الصورة]

[ندعوك للتسجيل في المنتدى أو التعريف بنفسك لمعاينة هذه الصورة]