أبدى الفنان محمد عدوية استياءه من المقارنات التي يجريها بعض الصحفيين بين جيل المطربين الشباب وجيل النجوم، خاصة المقارنة التي نشاهدها دائماً على صفحات الجرائد والمواقع الالكترونية بين المطربين تامر حسني وعمرو دياب.
وقال عدوية: "مقارنة إيه؟.. هو ليه يبقى فيه مقارنة بين عمرو دياب وتامر حسني؟، ليه كل الصحفيين بيسألوني عن الموضوع ده، هو تامر حسني قد عمرو دياب؟، أنا بحب تامر حسني، وهو مكسر الدنيا وشخص مجتهد، بس النجم عمرو دياب ده عملاق، ده بعيد عننا كلنا.. ده تاريخ، وأنا من عشاق عمرو دياب".
وأضاف عدوية: "إحنا كلنا لسه طالعين، سواء تامر أو محمد عدوية أو حماقي، محدش يعرف مين نمرة واحد، إحنا في حلبة مفتوحة كلنا بنخبط، لكن فيه ناس ما ينفعش نبقى معاهم في مقارنة، ولا عمرو دياب ولا إيهاب توفيق ولا هشام عباس، عيب، الناس دي بنوا تاريخ، لكن إحنا بقالنا 3 أو 4 سنين، واحد بيعمل ألبوم يفرقع، واحد يمثل فيشتهر أكتر، لكن مقارنات وكده مينفعش، أنا صريح جداً ومقتنع بكده" .
ونفى عدوية، في حواره مع مجلة "كلمتنا"، ما تردد حول استيائه من قيام والده، المطرب الكبير أحمد عدوية، بعمل دويتو مع الفنان اللبناني رامي عياش، وقال: "كل شيء نصيب، الفنان أحمد عدوية - والدي - جاله فنان محترم قدم أغنية عجبته، ورامي شخص محبوب في بلده وصاحب صوت رائع، حَب يعمل أغنية مع والدي وأنا كنت مرحب جداً بالموضوع لإني مش أناني، أنا حبيت أعمل دويتو قبل كدا بس كل حاجة وليها ظروفها".
وأضاف عدوية: "بعد ذلك عرضت عليه دويتو "المولد"، وقالي (أنا ماغنتش اللون ده قبل كده، تعالى نجرب يا محمد)، وعملنا بروفة وطلعت للناس، بس الكلام كان عاجبه جداً" .
وعن علاقته بشركة "كلمة"، المنتجة لألبوماته، أكد عدوية ان العلاقة بينهما جيدة وان كان يمر عليهما بعض المشاكل فهذا لا يعني ان يختلفا، وقال:"أي حد عنده سلبيات وعنده إيجابيات، ممكن أحياناً الواحد يختلف مع حد في حاجات معينة لكن ما يخسروش بعض، أنا أصلاً أول ظهوري كان مع شركة كلمة "المنتج ياسر حسنين"، وفعلاً الراجل ده وقف معايا كتير أوي، وأول ألبوم كان معاه، وأنا عمري في حياتي ما هخسره، وبشكره جداً لأنه له فضل كبير عليا".
وتطرق عدوية لحياته الشخصية خلال الحوار، مؤكداً ان الزواج اعطى حالة من الاستقرار والتنظيم في حياته، وأضاف: "زوجتي صحبتي جداً وبستشيرها في حاجات كتير، وبتتواجد معايا في البروفات كتير".
وفي نهاية الحوار أبدى عدوية رأيه في خوض تجربة التمثيل، قائلاً: "صاحب بالين كداب.. أنا أتعرض عليا أفلام كتير أوي وبمبالغ كبيرة، بس أنا مش بحب التمثيل.. ما بعرفش أمثل، مش عشان كل الناس بتمثل أنا أمثل، يعني عشان البنات تشاور عليا في الشارع؟، أنا مش قافل الباب، ممكن تقولي لما ألاقي حاجة لايقة عليا، بس هو مش في حساباتي دلوقتي، أنا موهوب أكتر في الغناء".
الثلاثاء 10 أكتوبر 2017, 7:41 pm من طرف 
العــمـــــــر
موضوع: عدوية: عمرو دياب تاريخ .. فلا تقارنوه بتامر أو بأي مطرب شاب 
