مقالات عمر طاهر - ماحدش كبير علي الأدب

ماحدش كبير علي الأدب


المقهي أصلاً متر في متر لكن بحكم موقعه الاستراتيجي في وسط البلد يديره عم أحمد كأنه مملكته الخاصة.

أخرج الموبايل عدة مرات من جيبه ينظر إلي شاشته ثم يعيده إلي جيب جلبابه، عم أحمد إذن يريد أن يسمعها مني (مبروك يا عم أحمد علي الموبايل ) رد بعنف: (مبروك علي إيه؟).

وقفت المجذوبة أمام باب المقهي وابتسمت لنا ابتسامة مخيفة ثم انتقلت إلي الرصيف المقابل وأخرجت من البؤجة بطانية افترشت نصفها وتدثَّرت بالنصف الثاني وقالت بصوت متعال: (هاتلي شاي)، أخرج زبون جنيهًا ووضعه علي الصينية الموجودة أمامه وقال لعم أحمد: (هاتلها شاي علي حسابي) لكن عم أحمد تجاهلهما.

دخل علينا رجل له هيبة لواءات المعاش ومعه زوجته الأرستقراطية، تغيرت ملامح عم أحمد، ألقي الرجل السلام ودخلت زوجته في الموضوع مباشرة (إحنا آسفين يا عم أحمد ع اللي حصل والله البيه مانامش من إمبارح بسبب الموضوع ده، (اكتست ملامح عم أحمد بالخجل وقال: (وماينامش ليه بس؟ ماحصلش حاجة)،أخرجت الزوجة ورقة بخمسين جنيهًا من حقيبتها وقدمتها لعم أحمد (طيب علشان خاطري خد دول ده تعويض بسيط عن اللي حصل) قابلها عم أحمد بالصمت (والنبي وحياة أولادي ماتكسفنيش) قالت الزوجة، مد عم أحمد يده وأخذها (عشان بس حلفتيني أنا هاخدها بس هاحطها في أقرب جامع. . أنا مابأقبلش العوض)، انكسرت نظرة الرجل ذي الهيبة وألقي السلام منصرفًا بعد أن ألقي نظرة أخيرة في وجه عم أحمد (يعني مسامح؟) قال له عم أحمد: (مجيتكم لحد هنا تنسي الواحد كل اللي ضايقوه مش انتوا بس)، ابتسمت الزوجة وسحبت زوجها وانصرفا.

رن موبايل عم أحمد فأخرجه قائلاً: (مش ممكن الصداع ده) ثم رد (أيوه حضرتك أنا في القهوة وفي انتظارك. . تشرفي يا بنتي)، لمح عم أحمد الفضول يطل من وجهي (أصل الموبايل ده أنا لقيته في سيدنا الحسين إمبارح والست صاحبته كل شوية تتصل تتطمن إنه لسه معايا. . بتقول إنها كانت بتزوَّر أباها العيان لسيدنا الحسين).

سألت عم أحمد عن الرجل الوقور وزوجته فقال لي: (واحد من الورشة اللي جنبنا خد شاي، رجع الصينية والكوبايات وبدل ما يدخلها جوه سابها علي عربية راكنة قدام القهوة، قبل ما أخدها لقيت الراجل ده بيفتح باب العربية وبيرمي الصينية والكوبايات في الأرض وكسرها ميت حتة، الناس الموجودون زي حضرتك هاجوا عليه ولسه هيكلموه قلت لهم ماحصلش حاجة، العيب علي الحيوان اللي ساب الصينية علي العربية ومااحترمش صاحبها، الراجل اتكسف وقال لي الكوبايات دي تمنها كام؟ قلت له لما زبون عندنا بيكسر كوباية مابناخدش منه تمنها. . عيب. . )، لاقت الحكاية استحسان الحاضرين فعطف علينا عم أحمد بالدرس المستفاد منها (مش هو راجل أقوي مني وممكن ياكلني؟ بس أهو جالي لحد عندي عشان ماحدش كبير علي الأدب).

قطع كلام عم أحمد وصول صاحبة الموبايل التي عرضت علي عم أحمد ورقة بعشرة جنيهات وأصرت علي أن يأخذها (يا ستي أنا لو عايز فلوس ماكنتش رجعت لك الموبايل أصلاً).

انصرفت السيدة ولمحنا في سيارتها رجلاً عجوزًا وبينما السيارة تبتعد أطل المقعد المتحرك من حقيبتها، اختفت السيارة فأصبحت المجذوبة في مواجهتنا أطلت من تحت البطانية وصرخت (فين الشاي؟)، نظر لها عم أحمد شذرًا وصرخ هو أيضًا (حاضر)، أعدَّ الشاي وقبل أن يخرج به من المقهي باتجاهها مد يده بخفة والتقط الجنيه ووضعه في جيبه